Тоймын огноо, дугаар: 2023 оны 01 дүгээр сарын 11, Дугаар 1
Тоймын төрөл: хэрэг хянан шийдвэрлэх ажиллагааны тойм
Шийдвэрийн төлөв: Хүчин төгөлдөр болсон
Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Засаг дарга захирамж гаргаж, сумын ерөнхий боловсролын сургуулийн захирал О-г ажлаас чөлөөлсөн байна. Сургуулийн захирал О-гоос "ажлаас чөлөөлсөн захирамжийг хүчингүй болгуулах, ажилд эгүүлэн тогтоолгох” нэхэмжлэл шүүхэд гаргасан.
О нь хэрэг хянан шийдвэрлэх ажиллагааны явцад ажлаас чөлөөлсөн захирамжийн үйлчлэл, биелэлтийг шүүхийн эцсийн шийдвэр гартал түдгэлзүүлэх хүсэлт гаргажээ.
Шүүхээс уг хүсэлтийг хангаагүй, захиргааны актын биелэлтийг түдгэлзүүлээгүй байна.
Учир нь актын биелэлтийг түдгэлзүүлэх хуулийн агуулга нь эрх зүйн түр хамгаалалт тогтоох, нэхэмжлэлийг хангасан шүүхийн шийдвэр гарах тохиолдолд нэхэмжлэгчийн эрх нь сэргэх боломжгүй үр дагавар үүсэхээс урьдчилан сэргийлэхэд оршдог.
Шүүхээс чөлөөлсөн шийдвэр нь үндэслэлтэй эсэхийг тогтоогоогүй байхад ажлаас чөлөөлсөн захирамжийг түдгэлзүүлснээр нэхэмжлэгчийн эрх сэргэхгүй, О-ийн хувьд захирлын ажлыг үргэлжлүүлэн хийх боломжгүй бөгөөд сургуулийн өдөр тутмын үйл ажиллагаа нь захирал хэн байхаас үл хамаарч хэвийн, тасралтгүй үргэлжлэх зарчимтай.
Төрийн албан хаагчийн хөдөлмөрлөх эрхтэй холбоотой маргааны хувьд шүүхээс нэхэмжлэгчийг ажлаас чөлөөлсөн захиргааны актыг хууль бус болохыг тогтоож, хүчингүй болгосон тохиолдолд нэхэмжлэгч нь маргаан бүхий акт гарснаас хойших хугацаанд зөрчигдсөн эрхээ бүрэн сэргээлгэх боломжтой байдаг тул эрх зүйн түр хамгаалалт зайлшгүй шаардлагатай биш юм.
Тоймыг бэлтгэсэн: Архангай аймаг дахь Захиргааны хэргийн анхан шатны шүүхийн шүүгч А.Түвшинтулга
