Захирамжийн дугаар огноо, дугаар: 2023.02.10129/ШЗ2023/00578
Шүүгчийн захирамжийн төлөв: Хүчин төгөлдөр
Тойм: 2023.02.15, процесс-2
Нэхэмжлэгч А "өөрийн эх Б, нас барсан эцэг В нарын өмчлөлийн компани, эзэмшлийн болон өмчлөлийн газар, хувийн сууц, үйлчилгээний зориулалттай барилгын хамтран өмчлөгч болохыг тогтоолгох” тухай нэхэмжлэлийг шүүхэд гаргасан бөгөөд эх Б хамтран өмчлөгчөөр тогтоохыг зөвшөөрч байгаа тухайгаа бичгээр илэрхийлсэн, эцэг В-н нас барсны гэрчилгээг нотлох баримтаар өгчээ.
А нь өөрийн эх Б-н өмчлөлийн эд хөрөнгийн хамтран өмчлөгчөөр бүртгүүлэх хүсэлтээ тухайн хөрөнгө оршин байгаа нутаг дэвсгэрийн улсын бүртгэлийн байгууллагад, харин нас барсан эцэг В-н эд хөрөнгө, эрхийг өвлөх асуудлаар өв нээгдсэн газрын нотариат, нотариатгүй газар баг сумын засаг даргад хандаж шийдвэрлүүлсний дараа шүүхэд нэхэмжлэл гаргах эрхтэй.
А нь өмчлөгчөөр тогтоолгох хүсэлттэй байгаа эд хөрөнгийн эрхийн талаар улсын бүртгэлийн байгууллага болон нотариат, баг сумын засаг даргад хандаж шийдвэрлүүлээгүй тохиолдолд шүүх шийдвэрлэх боломжгүй бөгөөд шүүхээс гадуур урьдчилан шийдвэрлүүлэх журмыг зөрчсөн, уг журмыг хэрэглэх боломжтой байна гэсэн үндэслэлээр шүүх нэхэмжлэлийг хүлээн авахаас татгалзсан.
Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Тойм бэлтгэсэн: Архангай аймаг дахь Сум дундын иргэний хэргийн анхан шатны шүүхийн шүүгч Ч.Жаргалан
