Монгол Улсын Ерөнхийлөгч Нийслэлийн эрүү, иргэний хэргийн давж заалдах шатны шүүхэд очихдоо "Шүүгчийн хариуцлагыг нэмэгдүүлэх, шударга ёсыг нэхэхийн тулд цалин хангамжийг нь нэмэгдүүлэх, нийгмийн асуудлыг шат дараалан шийдэх гэж оролдож байгаа. Гэхдээ олон хүний цалинг нэмдэггүй юм гэхэд хүний хувь заяаг шийддэг шүүгчдийнхээ хариуцлагыг дээшлүүлэхийн тулд цалингийн асуудлыг нь шийдье гэсэн юм. Эдийн засаг төсвийн хүндрэлтэй нөхцөл байгаа ч УИХ-ын түвшинд шүүгчдийн цалин, нийгмийн асуудлыг хөндөөгүй нь улс төрийн хувьд, хууль тогтоох байгууллага, бүх хүрээнд баталгаа гарч ирснийг харуулж байгаа сайн хэлбэр юм. Бүх түвшиндээ шүүгчдийн баталгааг хүлээн зөвшөөрч байна” гэж онцолсон юм.

Олон жил коммунист сэтгэлгээгээр явж ирсэн манайд тангараг өргөсөн хүн цалингүй ч ажиллах ёстой, үнэ хөлсгүй ч зүтгэ гэж сурталдаж ирсэн. Тиймдээ ч ирээдүй хойчоо бэлтгэдэг багшид 400 мянган төгрөг, хүний амь нас авардаг эмчид 500 мянгыг өгч байгаа.

Үүнтэй зэрэгцүүлж хүний хувь заяа дэнсэлдэг шүүгчдээ 700 мянгыг өгчихөөд тэрбум тэрбумын хэргийг шийд гэж гэнэн ч юм шиг, тэнэг ч юм шиг найдаж суусан нь саяхан.

Энэ бол яах аргагүй соц нийгмийн эмгэг. Шүүгчийн цалинг нэмсэнтэй холбоотойгоор цахим сүлжээнд арван хүний найм нь бүү нэм гэж хашгирч байсан нь нэг талаар Монголчуудын тамын тогооны үлгэр. Тэгвэл коммунист лоозонгоор гул барьсан гэнэн тэнэг энэ сэтгэлгээ ард үлдэж байгааг төрийн тэргүүн шүүхийн шинэтгэлийн бас нэгэн үр дүн гэж олж харсан нь энэ.

Монголд нэг ч гэсэн ажил мэргэжлийн баталгааг ийнхүү хүлээн зөвшөөрч эхэлнэ гэдэг маргааш багш, эмчийнх ч үнэлэгдэхийн урьтал биш гэж үү.

Эх сурвалж: Өдрийн сонин 2016.10.24