Шүүгчийн ёс зүйн зөрчлөөс урьдчилан сэргийлэх болон хууль зүйн өгүүлэл, нийтлэл бичих арга зүйд суралцаж, шүүхийн шинжилгээний тогтолцоо, түүний өнөөгийн байдлын талаар харилцан мэдээлэл, туршлага солилцох нөхцөл, боломжийг бүрдүүлэх, Хэнтий аймгийн Хар зүрхний Хөх нуурын түүхэн дурсгалт болон байгалийн үзэсгэлэнтэй сайхан газраар аялах зорилгоор 2015 оны 6 дугаар сарын 15-ны өдрөөс 6 дугаар сарын 19-ний өдрүүдэд явагдсан сургалтад анхан болон давж заалдах шатны шүүхийн 26 шүүгч, шүүхийн захиргааны 14 ажилтан оролцлоо.
Хар зүрхний Хөх нуур хэмээх энэ газар Тэмүжин 1189 оны шарагчин тахиа жил Чингис хаан буюу Далай их хаан цолонд өргөмжлөгдөж байсан түүхтэй.
Хөтөлбөрийн дагуу Дүүргийн Эрүүгийн хэргийн анхан шатны 3 дугаар шүүх, Дүүргийн Иргэний хэргийн анхан шатны 3 дугаар шүүхийн шүүн таслах ажиллагааны дүн мэдээ болон шүүхийн шинэтгэлийн үйл явцтай тус тус танилцлаа.
Хууль сахиулахын их сургуулийн Шинжлэн магадлахуй судлалын төвийн эрхлэгч, доктор, дэд хурандаа Б.Даваа,Шүүхийн судалгаа, мэдээлэл, сургалтын хүрээлэнгийн судлаач хууль зүйн доктор Ц.Мандах,судалгаа сургалт хариуцсан референт Х.Билгүнзаяа Сум дундын 27 дугаар шүүхийн шүүгч Л.Эрдэнэбат, Захиргааны хэргийн анхан шатны 13 дугаар шүүхийн шүүгч Б.Сугар нарын сургагч багш нар Шүүхийн шинжилгээний тогтолцоо, эрх зүйн орчин, Шүүхэд шинжээчийн дүгнэлт гаргаж буй өнөөгийн байдал, тулгамдаж буй асуудал; Хэрэг хянан шийдвэрлэх ажиллагаан дахь шинжээчийн дүгнэлт, шүүхийн практик, Шүүгчийн ёс зүй, Шүүгчийн ёс зүйн зөрчлийг хянан шийдвэрлэх ажиллагаа, Хууль зүйн эрдэм шинжилгээ, судалгааны өгүүлэл, нийтлэл бичих арга зүйн чиглэлээр 3 өдрийн сургалтыг бүлгийн хэлэлцүүлэг, кейс хэлэлцүүлэг, дадлага ажлын хэлбэрээр удирдан явуулсан байна.
Шүүгчийн ёс зүйн зөрчлөөс урьдчилан сэргийлэх мэдлэг, ур чадвараа нэмэгдүүлэн, Шүүхийн шинжилгээний тогтолцоо, шүүхийн практикийн талаар нэгдмэл ойлголттой болж, Хууль зүйн эрдэм шинжилгээ, судалгааны өгүүлэл, нийтлэл бичих арга зүйд суралцсан, шүүгч нар харилцан туршлага, санал бодлоо солилцсон ач холбогдолтой сургалт болж амжилттай явагдаж дууслаа.
Дараагийн орон нутгийн сургалт Увс аймгийн Хяргас нуур, Өмнөговь аймгийн Ёлын ам зэрэг байгалийн үзэсгэлэнт газруудад 8 дугаар сарын 17-23-ны өдрүүдэд зохион байгуулагдана.
ШҮҮХИЙН ХҮНИЙ НӨӨЦИЙН ГАЗАР
