Энэхүү хамтын ажиллагаа нь  Япон Улсын Олон Улсын хамтын ажиллагааны агентлаг (JICA)-ийн санхүүжилтээр хэрэгжүүлэх \"Шударга өрсөлдөөн, хэрэглэгчийн төлөө газрын чадавхийг бэхжүүлэх” төслийн хүрээнд Өрсөлдөөний эрх зүйгээр шүүгчдийг мэргэшүүлэх сургалт зохион байгуулах, олон улсын туршлага судлуулах, өрсөлдөөний эрх зүйг хөгжүүлэх, боловсронгуй болгох, шүүхийн практикийг судлах зэрэг чиглэлээр хамтран ажиллаж, тодорхой үр дүнд хүргэхэд чиглэгдэх юм.   

Хамтын ажиллагааны санамж бичигт гарын үсэг зурсны дараа Шүүхийн Ерөнхий зөвлөлийн дарга Н.Лүндэндорж хэвлэл мэдээллийнхэнд \"Өнөөдөр бид Шударга өрсөлдөөн, хэрэглэгчийн төлөө газартай хамтын ажиллагааны санамж бичгийг үзэглэж байна. Шүүх байгууллагын хувьд өрсөлдөөний эрх зүйн орчин шинэ тутам  учраас бид энэ төслийн хүрээнд шүүгчдээ сайн туршлага бүхий улс орон тэр дундаа Япон улсын Өрсөлдөөний туршлага, шүүхийн практикийг судлуулах сургагч багш нарыг бэлдэхээр боллоо. Манай бэлтгэгдсэн сургагч багш нар захиргааны хэргийн болон иргэний шүүгч нарт мэдсэн сурснаа зааснаар Монгол улсад Өрсөлдөөний эрх зүйн орчин нөхцөл сайжирна” гэж тодотголоо.

ШӨХТГ-ын дарга Т.Аюурсайхан \"Өрсөлдөөний тухай хууль нь 2010 онд батлагдсан харьцангүй шинэ хууль. Шүүхийн практикт зарим кейсүүд урьд өмнө шийдвэрлэгдэж байгаагүй цоо шинэ харилцаа байдаг. Өрсөлдөөний тухай хууль улс орны нийгэм, эдийн засгийн тогтвортой хөгжил, баялгийн зөв хуваарилалттай уялдаа холбоотой өргөн хүрээнд үйлчилдэг чухал ач холбогдолтой хууль юм. Иймд Жайкагийн төслийн хүрээнд өрсөлдөөний эрх зүйгээр шүүгчдийг мэргэшүүлэх, сургалт зохион байгуулах, олон улсын туршлага судлуулах, өрсөлдөөний эрх зүйг хөгжүүлж, улам боловсронгуй болгох, судалгаа хийх зэргээр Шүүхийн ерөнхий зөвлөлтэй хамтран ажиллана” гэв.