Захиргааны эрх зүйн шүүгч-багш нарын сургалт эхэллээ
2024-11-23 | 69Шүүхийн ерөнхий зөвлөлөөс ХБНГУ-ын Ханнс-Зайделийн сантай хамтран захиргааны эрх зүйн шүүгч-багш нарын сургалтыг зохион байгуулж байна. Сургалтын нээлтэд Шүүхийн ерөнхий зөвлөлийн Гүйцэтгэх нарийн бичгийн дарга, хууль зүйн ухааны доктор Т.Мэндсайхан, ХБНГУ-ын Ханнс Зайделийн сангийн Монгол дахь төлөөлөгчийн газрын тэргүүн, хууль зүйн шинжлэх ухааны доктор Ц.Сарантуяа нар оролцов.
Шүүхийн ерөнхий зөвлөлийн Гүйцэтгэх нарийн бичгийн дарга Т.Мэндсайхан сургалтыг нээж хэлсэн үгэндээ захиргааны эрх зүйн чиглэлээр шүүгчдийг сургах, давтан сургах, шүүгч-багш нарыг бэлтгэхэд 2004 оноос хойш тууштай хамтран ажиллаж буй Ханнс-Зайделийн санд талархал илэрхийлээд, энэ удаагийн сургалтын хүрээнд захиргааны хэргийн шүүгчдэд зориулсан хууль хэрэглээний сургалтын сэдэв, агуулгыг тодорхойлж, сургалтын гарын авлага бэлтгэх ажлын төлөвлөлт, зохион байгуулалтын асуудлаар санал солилцоно гэдгийг онцоллоо.
![\"\"](\"http://www.judcouncil.mn/uploads/posts/2015-05/1432023525_11327999_1071262602903311_17565610_o-1.jpg\" "\\"\\"")
Сургалтыг ХБНГУ-д захиргааны байгууллага, захиргааны хэргийн шүүх, захиргааны сургууль зэрэг байгууллагуудад олон жил ажилласан туршлагатай ХБНГУ-ын Бавари мужийн Захиргааны сургуулийн захирал асан доктор Ю.Харбих удирдан явуулж байгаа бөгөөд захиргааны ерөнхий хуулийн (төсөл) зарчмууд, зохицуулах харилцаа сэдвээр сургалтыг эхлүүллээ.
Сургалтаар захиргааны актын биелэлтийг түтгэлзүүлэх үндэслэл, журам, эрх зүйн хэм хэмжээг тайлбарлан хэрэглэх зэрэг захиргааны процессын эрх зүйн хүрээний асуудлаар сургагч багш болон оролцогчид харилцан мэдлэг, туршлагаа солилцоно. Сургалт 2015 оны 5 дугаар сарын 21-нийг дуустал үргэлжилнэ.
ШҮҮХИЙН ХҮНИЙ НӨӨЦИЙН ГАЗАР