Шүүхийн ерөнхий зөвлөлөөс орон нутагт зохион байгуулж буй олон хувилбарт болон чөлөөт сонголтын тогтолцоо бүхий шүүхийн сургалт Архангай аймгийн Цэнхэр суманд 2015 оны 06 дугаар сарын 15-19-ний өдрүүдэд үргэлжилж байна. 

14 шүүхийн шүүгч, шүүхийн захиргааны ажилтнууд хамрагдаж буй тус  сургалтын зорилго шүүгчийн ёс зүйн зөрчлөөс урьдчилан  сэргийлэх болон шүүхийн шинжилгээний тогтолцоо,түүний өнөөгийн байдлын талаар болон хууль зүйн өгүүлэл нийтлэл бичих арга зүйд суралцаж, харилцан мэдээлэл, туршлага солилцож зөвлөлдөхөд чиглэгдэж байгаа юм.

Сургалтын эхний өдөр сургалтанд оролцогчид Сум дундын 1 дүгээр шүүх, Захиргааны хэргийн анхан шатны 1 дүгээр шүүхийн үйл ажиллагаатай тус тус танилцаж, шүүн таслах ажиллагааны сүүлийн үеийн дүн мэдээ болон шүүхийн шинэтгэлийн үйл явцыг сонирхлоо.

Шүүгчдийн өдөр тутмын үйл ажиллагаанд нийтлэг тохиолддог ёс зүйтэй холбоотой жишээнд тулгуурласан \"Шүүгчийн ёс зүй” сэдэвт хичээлийг Сум дундын 2 дугаар шүүхийн шүүгч Д.Мөнхөө заасан нь шүүгчдийн дунд идэвхтэй мэтгэлцээн, ажил хэрэгч санал өрнүүлсэн үр дүн бүхий хичээл болов. Шүүгчийн ёс зүйн зөрчлийг хянан шийдвэрлэх ажиллагаа хэлэлцүүлгийн үеэр Шүүгчийн ёс зүйн дүрэм, Хуульчийн мэргэжлийн үйл ажиллагаанд баримтлах дүрмийн харилцан зөрчилдсөн заалтуудын талаар онцгойлон дурьдагдлаа.

Дараагийн өдрийн хичээл Эрүүгийн хэргийн давж заалдах шатны 1 дүгээр шүүхийн шүүгч Б.Дэнсмаагийн \"Хэрэг хянан шийдвэрлэх ажиллагаан дахь шинжээчийн дүгнэлт,  шүүхийн практик”, ШСМСХ-ийн судлаач Л.Галбаатарын \"Шинжээчийн дүгнэлт хэрэг маргааныг шийдвэрлэх нотолгооны хэрэгсэл болох нь: Шүүхийн сонгомол шийдвэрүүдийн жишээн дээр” сэдвээр тус тус үргэлжлэв. Сургалтанд олон жилийн туршлагатай шүүгчид шүүн таслах ажиллагаанд тохиолддог анхаарууштай жишээнүүдийг ишлэн ярилцаж, санал солилцсоноор өндөрлөлөө.

Сургалтанд оролцогчид Арын сайхан хангайн байгалийн үзэсгэлэнт нутагт ийнхүү үр дүн, өгөөжтэй сургалт зохион байгуулж, харилцан туршлага солилцоход анхаарч байгаад сэтгэгдэл өндөр байгаагаа илэрхийлж, Шүүхийн ерөнхий зөвлөлд талархал уламжилж байна.