АНУ-ын Муж улсуудын шүүхийн үндэсний төвийн Дэд ерөнхийлөгч ноён Жеффри Апперсон Монгол Улсын шүүхийн байгууллагад 2015 оны 6 дугаар сарын 21-ээс 7 сарын 2-ныг хүртэл албан айлчлал хийж байгаа билээ. Энэ айлчлалынхаа хүрээнд \"Шүүхийн захиргааны удирдлага” сэдвээр анхан болон давж заалдах шатны шүүхийн Ерөнхий шүүгч, тамгын газрын дарга нар, шүүхийн захиргааны ажилтнуудад сургалт, хэлэлцүүлэг явуулж байна.

Өнөөдөр эхэлсэн сургалт, хэлэлцүүлгийг нээж Шүүхийн ерөнхий зөвлөлийн Гүйцэтгэх нарийн бичгийн дарга Т.Мэндсайхан хэлэхдээ \"Бид Ерөнхий шүүгч, шүүхийн тамгын газрын дарга нарыг хамтад нь оролцуулсан анхны арга хэмжээгээ зохион байгуулж байна. Энэ удаагийн сургалт, хэлэлцүүлгийг шүүхийн захиргааны удирдлагын чиглэлээр мэргэшсэн зөвлөх, АНУ-ын төдийгүй олон улсын шүүхийн захиргааны байгууллагын тогтолцоо, үйл ажиллагаа, сайн туршлагын талаар арвин их мэдлэг, туршлага хуримтлуулсан доктор Жеффри Апперсон удирдан явуулж байгааг мэдэгдэхэд таатай байна” гэлээ. Мөн хэлэлцүүлгийн үеэр шүүхийн захиргааны удирдлагыг үр нөлөөтэй хэрэгжүүлэх талаарх санал бодлоо чөлөөтэй илэрхийлж, харилцан мэдээлэл солилцож сургалт, хэлэлцүүлэгтээ идэвхитэй оролцохыг оролцогчдод хандан хүслээ.

Энэ сарын 23-24-ний өдрүүдэд үргэлжлэх сургалт, хэлэлцүүлэг нь шүүхийн захиргааны удирдлага ба менежмент, шүүхийн ил тод, нээлттэй байдал ба шүүхэд итгэх олон нийтийн итгэл, хэргийн хөдөлгөөний удирдлага, шүүхийн иргэдийн төлөөлөгч сэдвээр зохион байгуулагдана.

ШҮҮХИЙН ХҮНИЙ НӨӨЦИЙН ГАЗАР