Хятадын шүүх нийт хэргийн 80 хувийг цахимаар шийдвэрлэж байна гэв
2024-09-08 | 146Шүүхийн ерөнхий зөвлөл, БНХАУ-ын Ардын дээд шүүхийн дэргэдэх Үндэсний шүүгчдийн коллежтой хамтарсан 12 дахь удаагийн сургалт өнөөдөр (2024.05.20) Бээжин хотноо үргэлжилж байна.
Сургалтад БНХАУ-ын их шүүгч, Бүх Хятадын Ардын дээд шүүхийн шүүн таслах хорооны байнгын гишүүн, шүүгч Лью Гуйсян “Хятадын иргэний болон арилжааны хэрэг шүүхэд хянан шийдвэрлэх тогтолцоо” сэдвээр хичээл заалаа. БНХАУ-ын онцлогтой дагнасан шүүхүүд, эвлэрүүлэн зуучлах тогтолцоо, шүүхийн зөвлөл, хууль тайлбарлах, шүүхийн жишиг кэйсүүд, нийтийн ашиг сонирхлыг төлөөлөх нэхэмжлэл зэргийн талаар танилцуулсан юм. Тус улсын Дээд шүүхийн байгууллагаас шүүхийн жишиг бүхий кэйсүүдийг хэвлэн гаргаж, нийт шүүгчдийг мэдээллээр хангадаг байна.
Тус улсад цэргийн, төмөр замын тээврийн, далайн хэргийн, ойн аж ахуйн, газрын тосны, далайн хэргийн зэрэг дагнасан шүүхүүд байгуулагджээ. Мөн Ханьжоү, Бээжин, Гуанжоу 3 хотод цахим орчинд үйлдэгдсэн гэмт хэргийг төвлөрүүлэн харъяалах анхан шатны цахим шүүхүүд байгуулагджээ. Хятад улс нийт хэргийн 80 хувийг интернетээр буюу цахимаар шийдвэрлэж байгаа аж. Шүүх цахимжсан нь зөвхөн шүүгчдэд төдийгүй иргэдэд эдийн засгийн үр өгөөжтэй, хэргийг шийдвэрлэхэд зардал, чирэгдэл багассан учраас иргэд нь сэтгэл хангалуун байгаа гэв.
Монгол Улс цахим шүүх рүү шилжиж, цаасгүй цахим болохыг зорьж байгаа бөгөөд захиргааны хэргээс эхлээд цахимжуулах алхмуудыг хийх гэж байгаа талаар Шүүхийн ерөнхий зөвлөлийн гишүүн Н.Отгончимэг энэ үеэр дуулгалаа.
Бээжин, Шанхай, Гуанжоү, Хайнань зэрэг чөлөөт худалдааны боомт хотуудад оюуны өмчийн эрхтэй холбоотой хэргүүдийг харъяалах 4 шүүх байгуулагдсан байна. Шанхай, Бээжин, Чэндү-Чончингийн эдийн засгийн тойргуудад санхүүгийн 3 шүүх тус тус байгуулагджээ.
БНХАУ-ын үндэсний шүүгчдийн коллежийн дэд ерөнхийлөгч Ван Сяофан “Гадаадын хөрөнгө оруулалтын тухай хууль, Хятад улсын нээлттэй хөрөнгө оруулалтын зах зээлийн эрх зүйн хамгаалалт сэдвээр танилцуулсан юм.
Шүүхийн ерөнхий зөвлөл, БНХАУ-ын Ардын дээд шүүхийн дэргэдэх Үндэсний шүүгчдийн коллежтой хамтран зохион байгуулж буй 12 дахь удаагийн сургалт маргааш (2024.05.21) Бээжин дэх интернет шүүхэд очиж, цахимаар хэрэг маргааныг хянан шийдвэрлэж буй туршлага судалснаар үргэлжилнэ.
Энэ удаагийн сургалтад Монгол Улсаас Шүүхийн ерөнхий зөвлөлийн гишүүн Н.Отгончимэг, Нийслэл дэх Эрүүгийн хэргийн давж заалдах шатны шүүхийн Ерөнхий шүүгч Б.Зориг, Баянзүрх дүүргийн Иргэний хэргийн анхан шатны шүүхийн шүүгч Т.Энхжаргал, Баянгол дүүргийн Иргэний хэргийн анхан шатны шүүхийн шүүгч Б.Азбаяр, Дундговь аймаг дахь Захиргааны хэргийн анхан шатны шүүхийн шүүгч Б.Сугиржав, Төв аймаг дахь Иргэний хэргийн анхан шатны шүүхийн шүүгч Б.Түвшинжаргал, Шүүхийн ерөнхий зөвлөлийн Захиргаа удирдлагын газрын дарга Л.Санжрагчаа, Шүүхийн захиргааны хүний нөөцийн газрын дарга Д.Мөнхбат, шүүхийн тамгын газрын дарга нар болон шүүхийн захиргааны ажилтан нийт 25 хүн оролцож байна.
Хэвлэл мэдээллийн хэлтэс