Шүүхийн ерөнхий зөвлөлийн гишүүдэд Шүүхийн ерөнхий зөвлөлийн ажлын албанаас хүндэтгэл үзүүлэх арга хэмжээ өнөөдөр боллоо. Шүүхийн шинэтгэл, шүүхийн тухай багц хуулийг хэрэгжүүлэх түүхэн цаг үед Шүүхийн ерөнхий зөвлөлийн гишүүнээр гурван жил ажиллаад бүрэн эрхийн хугацаа нь дуусгавар болж буй Д.Дамдин-Од, Ж.Эрдэнэчимэг нарт ажлын албаны нийт хамт олны өмнөөс \"Алтан Фемида”, дурсгалын зүйл гардуулж, ажлын амжилт хүслээ.

Шүүхийн ерөнхий зөвлөлийн дарга Н.Лүндэндорж 3 жил хамтран ажилласан тэдэнд хандаж хэлсэн үгэндээ \"Гурван жил маш хурдан өнгөрчээ. Өнгөрсөн хугацаанд бид Монгол Улсын Ерөнхийлөгч Ц.Элбэгдоржийн санаачилж эхлүүлсэн шүүхийн шинэтгэл, Шүүхийн тухай багц хуулийг хэрэгжүүлэхэд Алунгоо эхийн багц сум шиг нэгэн баг болж, гар нийлж ажилласан. Шүүхийн шинэтгэл гэсэн нэгэн зорилго биднийг нэгтгэж, зангидсан гар шиг ажилласан учраас богино хугацаанд маш их ажлыг амжуулж чадлаа. Өнгөрсөн гурван жилд бид шүүхийн шинэтгэлийг хэрэгжүүлэхтэй холбоотой 70 гаруй дүрэм, журам гаргасан. Энэ их ажлыг амжуулахад чухал үүрэг гүйцэтгэсэн Д.Дамдин-Од, Ж.Эрдэнэчимэг нартаа цаашдын ажилд нь амжилт, амьдралд нь хамгийн сайн сайхан бүхнийг хүсэн ерөөе. Шинээр бүрдсэн Шүүхийн ерөнхий зөвлөлд цаашид хийх ажил их байгаа. Гаргасан дүрэм, журмаа боловсронгуй болгохоос эхлээд маш их ажил биднийг хүлээж байна. Шүүхийн ерөнхий зөвлөлийн даргын хувьд бид цаашид шүүгчийн сургалтад эн тэргүүнд ач холбогдол өгч ажиллах болно гэдгээ ажлын албаны нийт хамт олондоо бас дуулгамаар байна” хэмээн онцолсон юм.

Мөн энэхүү арга хэмжээний үеэр Шүүхийн ерөнхий зөвлөлийн гишүүнээр шинээр томилогдсон О.Зандраа, П.Батсайхан нарт энгэрийн тэмдэг гардуулж, ажлын амжилт хүслээ.

Шүүхийн хэвлэл мэдээлэл, олон нийттэй харилцах хэлтэс