Монгол Улсын Шүүхийн ерөнхий зөвлөл, Бүгд Найрамдах Турк Улсын Хууль зүйн академи хооронд байгуулсан хамтын ажиллагааны санамж бичгийн хүрээнд Бүгд Найрамдах Турк Улсын Истанбул болон Анкара хотод 2015 оны 10 дугаар сарын 02-09-ны өдрүүдэд зохион байгуулагдах сургалтад Монгол Улсаас 20 шүүгч, шүүхийн захиргааны ажилтны бүрэлдэхүүнтэй баг БНТУ-ын Анкара хотыг зорилоо.

Монгол Улсын Шүүхийн ерөнхий зөвлөлийн дарга Др. Проф. ноён Н.Лүндэнддорж албан ёсоор биечлэн БНТУ-д 2014 оны 11 дүгээр сарын 29-нөөс 12 дугаар сарын 02-ны өдрүүдэд айлчилсан ба айлчлалын хүрээн БНТУ-ын Хууль зүйн академитай хамтын ажиллагааны санамж бичиг байгуулсан билээ.

Тухайн санамж бичигт хоёр тал харилцан шүүхийн шинэтгэлийн талаар авч хэрэгжүүлсэн арга зам болон бусад сайн туршлагаас харилцан судлах, шүүгч, шүүхийн захиргааны ажилтан сургалтад хамруулан мэргэжил, мэргэшлийг дээшлүүлэх, хоёр байгууллагын талаар харилцан мэдээлэл хийж, хамтын ажиллагааг үр нөлөөтэйгөөр бэхжүүлэн хөгжүүлэх, хамтарсан төсөл хөтөлбөр хэрэгжүүлэх зэрэг үйл ажиллагааг явуулах талаар дурдсан.

Хамтын ажиллагааны санамж бичигт заасны дагуу Монгол Улсаас анх удаагаа 15 шүүгч, 5 шүүхийн захиргааны ажилтан 2015 оны 10 дугаар сарын 02-10-ны өдрүүдэд сургалтад хамрагдахаар болсон бөгөөд тухайн өдрүүдэд БНТУ-ын Хууль зүйн академи, Үндсэн хуулийн цэц, Улсын Дээд шүүх, Шүүх, прокурорын дээд зөвлөл, Анкара хот баруун тойргийн шүүх зэрэг байгууллагуудаар зочлохын зэрэгцээ БНТУ-ын хууль зүйн тогтолцоо, Туркийн эрх зүйн түүхэн хөгжлийн хүрээн дэх шүүхийн ёс зүй, Шүүхийн хараат бус, бие даасан байдал ба ёс зүй зэрэг сэдэвт сургалтад хамрагдана. Тухайн сургалтуудыг БНТУ-ын хууль, эрх зүй, ёс зүйгээр өндөр мэргэшсэн доктор, профессор цолтой сургагч багш нар явуулах юм.