Иргэд шүүх дэх эвлэрүүлэн зуучлагчид хандах нь ихэсчээ. Эвлэрүүлэн зуучлалын ажиллагаа нь иргэд хоорондын маргааныг эвийн журмаар, шуурхай, зардал багатай шийдвэрлэдэг онцлогтой.

Эвлэрүүлэн зуучлагчаар хэрэг маргаанаа шийдүүлсэн иргэд талархлаа илэрхийлснийг хүргэе.

Эвлэрүүлэн зуучлагчийн орон тоог нэмэх шаардлагатай

Ховд аймгийн иргэн Б.Сундуйжав:\"Ховд аймаг дахь сум дундын иргэний хэргийн анхан шатны шүүхийн эвлэрүүлэн зуучлалаар маргаанаа шийдвэрлүүлэхээр өргөдөл гаргасан юм. Талуудын ашиг сонирхолд нийцэхүйц шийдлийг олоход нь дэмжлэг үзүүлж хоорондын харилцааны зөрчил, маргааныг эвийн журмаар, зардал багатай шийдвэрлэж өгсөн эвлэрүүлэн зуучлагчид талархлаа илэрхийлье. Эвлэрүүлэн зуучлах ажиллагаа нь бид бүхний цаг завыг хэмнэсэн, хурдан шуурхай, эв зүйгээр шийдвэрлэдэг маш давуу талтай юм байна. Цаашид эвлэрүүлэн зуучлах ажиллагааны бүтэц бүрэлдэхүүнийг өргөтгөх, хүний нөөц, орон тоог нэмэх шаардлагатай мэт санагдлаа” гэв.

Маргаанаа шийдүүлэхэд хялбар болсон

Орхон аймгийн Баян-Өндөр сумын иргэн Б.Бямбажав, Б.Цэрэнчимэд нар: \"Бид аймгийнхаа төвд барьцаалан зээлдүүлэх төв ажиллуулдаг. Зарим тохиолдолд зээлдэгч маань мөнгөө өгөхгүй шүүхэд хандахаас аргагүй болдог. Шүүхэд хандахаас тэмдэгтийн хураамж төлөх, цаг хугацаа их зарцуулахаас эхлээд хүндрэлтэй байсан. Харин эвлэрүүлэн зуучлагч ажиллаж эхэлснээс хойш маргаанаа шийдүүлэхэд хялбар боллоо. Орхон аймгийн Иргэний хэргийн анхан шатны шүүхийн эвлэрүүлэн зуучлагч П.Бямбацэцэг, туслах Л.Алтансүх нар үйлчлүүлэгчидтэйгээ найрсаг харилцдаг. Талуудыг эвлэрэх бүхий л боломжоор хангадаг. Эвлэрүүлэн зуучлалаар асуудлаа шийдүүлэхэд цаг зав, мөнгө төгрөг хэмнэхээс эхлээд ач холбогдол ихтэй. Мөнгө зээлсэн, биднээс үйлчилгээ авсан хүмүүстэйгээ эвлэрнэ гэдэг хамгийн том давуу тал. Зарим тохиолдолд хариуцагч олддоггүй. Тиймээс эвлэрүүлэн зуучлагчид эрэн сурвалжлуулах эрх олгохыг хүсч байна” гэв.

Шүүхийн хэвлэл мэдээлэл, олон нийттэй харилцах хэлтэс